Larunbatean Urban Gazte Jaialdia ospatuko da laugarrenez Ermuan. Rapeatze lehiaketarekin zabalduko da egitaraua, hots, "Oilar borroka"bezala ezagutzen den norgehiagokarekin, 18:00etan. 19:00etan Cirujanos hip-hop taldearen kontzertua izango da eta ondoren oilar borrokaren finala. Bukatzeko, Logela Multimediaren "Papiro-flexia" (bideoa hemen) ikuskizuna taularatuko dute. Ekitaldi guztiak plazan izango dira.

 

Ermuko San Juan Sua asteazkenean ospatuko da, hilak 23. Aurtengo berrikuntzen artean, irrintzi ikastaro bat antolatu da Nekane Akarregirekin. Astelehenean izango da, hilak 21, 20:00etan Musika Eskolan. Ordubete inguruko ikastaroan irrintzia botatzeko teknika erakutsiko da. San Juan gaueko irrintzi lehiaketara prestatuago joateko aukera paregabea dugu, eta doakoa da.

San Juan gaueko beste ekitaldi berria "Axuri Beltza" dantzaldi jendetsua izango da. Facebook-en bidez iragarri da jada eta Ermuko dantzazale gazte orori deialdi irekia egina dago.

Beste hainbat ekitaldi ere izango ditugu plazan, iluntzean: txalaparta, Pispilu abesbatza, suzko zezena, musika,... eta Sua, noski.

"El cónsul de Sodoma" emango da gaur zine-klubean, zine gay eta lesbikoaren zikloarekin jarraituz. Mudo-drogot cinematógrafo Ermuko zinemazale taldeak antolatzen du Ermuko Udal Liburutegiarekin batera (ematen diren filmen DVDak, gero, liburutegian izaten dira denon eskura).

Betiko lez, bi sesio izango dira, 19:00etan eta 21:30ean. Lobiano  kulturguneko aretoan, doan.

Irakurri, Gozatu eta Oparitu kanpainak aurrera jarraitzen du, hilabete pasatxoko epea geratzen da oraindik liburutegian liburu bat irakurri, fitxa bete, deskontu txartela jaso eta zure lagunen bati liburu bat oparitzeko.

Dagoeneko, lagun talde batzuk eratu dira ekimen hau baliatuz lagun ikusezinaren jokoa egiteko. Baina bakarka ere parte hartu ahal da. Dinamika oso erreza da: Euskarazko liburu bat hartu liburutegian, irakurri ondoren itzuli, fitxa bete. Horrela deskontu txeke bat jasoko duzu Ermuko liburudendetan euskarazko liburu bat erosteko, zure lagun bati oparitzeko, adibidez.

Ermuko zenbait lagunek liburu gomendio zerrenda bat egin dute: Deskargak atalean dago eskura, edo hemen klik eginez.

Ernesto Etxabe eibartarraren "Aspertzea debekatuta" izango da 2010eko Santixauetako kartela, Jai Batzordeak hala erabakita. Zer iruditzen?