Sustatun ikusi dugu Maite Goñi irakasle eta blogariak sortutako Hitzapasa jokoa. Telebistako Pasapalabra hori, baina euskaraz, eta Interneten. Egin klik irudian edo hemen Sustatu.com-eko artikulu osoa irakurri eta Hitzapasa jokoa probatzeko.

Astebururako gure herriko eskaintza kulturala gogoratuko dugu. Gaur ostirala, Zumaia eta Ermuko Alboka Musika Bandek kontzertua emango dute, 20:30ean, Santiago elizan. Sarrera dohainik.

Gaueko 22:15ean, Lobianon, antzerki dibertigarri bat izango da Alba Sarrauteren eskutik, "Mirando a Yukali". Antzezlan hau, Espainia mailako saririk garrantzitsuenetarikoa jasoa da, Tárregako antzerki ferian publikoak emandakoa, hain zuzen ere. Sarrerak 5€ balio du.

Emakumeen mundu martxa gaur eguerdian pasatu da Ermutik. Herritik karabanan ibili ostean ekitaldia izan da plazan. Ondoren Zarautzerantz abiatu da.

Informazio gehiago dago plataforma antolatzailearen blogean.

Marijo, Maite, Marijo, Marisol, Lupe, Yolanda eta Arrate Erretena elkartean biltzen dira astero ordubetez euskaraz aritzeko. Elkarte gastronomiko bereko kide dira guztiak, Erretenakoak, beraz, aurretik ezagutzen zuten elkar. Horrek laguntzen du taldearen dinamismoan, izan ere, berbalagun ordutik aparte, bestelako ekintzak egiten dituzte elkarrekin. Elkarrekin doaz denak aquagym egitera kiroldegira, afari bat egiten dute hilero eta noizean behin antzerkira ere elkarrekin joaten dira. Hori dena euskaraz. "Tira, batzutan erdera batuara jotzen dugu" aitortzen du Marisolek.

Marisol da euskaldunzahar bakarra taldean, eta "irakasle" lanak hartzen ditu. Beste kideak euskara ikasleak edo ikasle ohiak dira eta ederto pasatzen dute elkarrekin euskara praktikatzen.

Berbalagunentzako "xaboi ekologiko" ikastaroa beraiek antolatu eta emango dute. 

Mutilik ez dago taldean baina elkartean egoten diren batzuk laguntza ematen diete Tribialean, "haiek dira gure Google, kirol kontuetan batez ere".

Badakizu, emakume hauek kalean topatzen badituzu, euskaraz egiezu, eskertuko dizute eta.

Bertako Bilduma atala inauguratu du Ermuko Udal Liburutegiak. Ermuan sortutako informazio, dokumentu zein kultur ondarea biltzeko asmoarekin egindako webgunea da, Udalaren webgunearen baitan.

Aurreko astean aurkeztu zen egitasmo hau amaitu gabe dago, hau da, material asko sareratzea falta da oraindik, baina Ermuko Ondarea eskura edukiko dugun ataria etengabe hornitzen joango dira.

Irudian klik egin eta bisitatu Ermuko Liburutegiko Bertako Bilduma.